பரவாயில்லை

பசியில் சுருண்ட ஒரு மனிதனின்

கடைசி உயிர்த்துளி சொட்டும் ஓசைக்காக மலைமுகடுகளில் காத்திருக்கின்றன

வல்லூறுகள்

வன்புணரப்பட்ட சிறுமியின்

கால் வழி பெருக்கெடுக்கும் குருதியை

இரகசியமாகத் துடைத்துக்கொண்டிருக்கிறாள்

எங்கோ ஓர் தாய்

காதலனின் மார்பு மயிரளைந்தபடி

கணவனின் நெஞ்சுவலி குறித்து விசனித்துக்கொண்டிருக்கிறாள்

தொலைபேசியில் ஒருத்தி

வீடு திரும்பச்சொல்லி இறைஞ்சும்

முதியதாயின் நெஞ்சில் கால்பதித்து

சாக்கடையில் தள்ளுகிறான்

ஒரு குடிகாரன்

பனங்கூடல்களுக்கிடையிலிருந்து

ஒலி்த்துக்கொண்டிருக்கிறது

இன்னமும் கண்திறக்காத பூனைக்குட்டிகள்

கத்தியலையும் சத்தம்

பாரவண்டிச் சாரதியிடம் திருட்டுக்கொடுத்த

அம்பது ரூபாவை நினைத்து விசும்பியபடி

வீடு திரும்பிக்கொண்டிருக்கிறாள்

நடுநிசி மல்லிகைப் பூக்காரியொருத்தி

இந்தக் குரூர உலகில்

நீயும் விடைசொல்லிப் பிரிகிறாய்

அதனாலென்ன…

பரவாயில்லை!

16 செப்டெம்பர் 2007